Eeen lehrt nie ut

Een lehrt nie ut Mien Fründ Walter is Discher un kann vun sien Arbeit allerlei vertellen. He leggt dat geern dorop an to bewiesen, dat ik Klookschieter vun sien Handwark lang nich allens weet. Letzt ok wedder. Ik mutt gestohn, dat ik bit dorhen noch nienich wat vun en „Recht ton Hamerslagen“ höört heff. Un akraat dat hett he mi fraagt. Würklich wohr! „Du weest doch sünst ümmer allens,“ grient he achtersinnig. „Wat? Nee, kenn ik nich! Tüdelkraam! En Recht ton Slagen mit` n Hamer? Ohn Hamer kümmst du as Discher doch gor nich klaar. Bruukst doch keen egen Recht för. Du spinnst doch!“ He: „Nee, nee, överlegg doch noch maal.“ Ik weet, dat em dat Spooß maakt, den Kloken to spelen, un ümmer `ne Wiel bruukt bit he op`n Punkt kümmt. „Walter, willst du mi veräppeln? En Recht ton Slagen mit`n Hamer? Jo, fröher de Meister in de Dörpssmeed, jo, de harr dat Recht ton Hamerslagen. Sogor Sünndags! Wenn en Peerd en nies Hoofiesen nödig harr. Meenst du dat dat för sien Larmmaken `n besünner Naver-Recht geev?“ „Oh, gor nich slecht,“ smeert he mi Honnig üm Boort. „An di is `n Afkaat verloren gohn. Mit Naver büst du op de richtig Spoor. Paß op: Ik will mien Huus rundrüm niee Farv un niee Fenster günnen und dat Gerüst dorför mutt ik op Navers Land stellen. Allens örntlich fastmaken un losleggen. Dor is `n Barg Hamer-Insatz nödig. Un ik mutt ok sien naverlichen Luftruum nutten. Dat allens is regelt in dat „Hammerschlag- und Leiterrecht“. Ik: „Sowat gifft dat?“ He: Sühst wull, sühst wull, du weest ok nich allens, oder! Ik lässig den Dumen hoch: „Okay, hesst maal wedder wunnen Walter! Hier gibt es mehr Plattdeutsch: Podcast: Die plattdeutsche Morgenplauderei "Hör mal 'n beten to" als als kostenloses Audio-Abo für Ihren PC: https://www.ndr.de/wellenord/podcast3096.html Die Welt snackt Platt: Alles rund um das Thema Plattdeutsch: https://www.ndr.de/plattdeutsch